ದಾರಿ ತಪ್ಪಿದಾಗ ನೆರವಿಗೆ ಬರುವ ಮ್ಯಾಪ್ಸ್ ಬಳಸುವುದು ಹೇಗೆ?

ಬಹುಮುಖೀ ಕಾರ್ಯಸಾಧನೆಗೆ ನೆರವಾಗುವ ಸ್ಮಾರ್ಟ್‌ಫೋನ್‌ಗಳ ಹಲವು ಉಪಯೋಗಗಳಲ್ಲಿ ‘ಮಾರ್ಗ’ದರ್ಶನವೂ ಒಂದು. ಅಂದರೆ, ಯಾವುದಾದರೂ ಊರಿಗೆ ಹೋಗಬೇಕೆಂದಾದರೆ, ಇಲ್ಲವೇ ನಗರದೊಳಗೆ ಒಂದು ಪ್ರದೇಶದಿಂದ ಮತ್ತೊಂದಕ್ಕೆ ನಮ್ಮದೇ ಬೈಕ್, ಕಾರು ಅಥವಾ ಸೈಕಲ್‌ನಲ್ಲಿ ತಿರುಗಾಡಬೇಕೆಂದಾದರೆ, ನಮಗೆ ದಾರಿ ಗೊತ್ತಿರಬೇಕು. ಇದೆಯಲ್ಲ ಮೊಬೈಲ್ ಫೋನ್! ಅದುವೇ ನಮಗೆ ಪ್ರತಿ ತಿರುವಿನಲ್ಲಿಯೂ ಮಾರ್ಗದರ್ಶನ ನೀಡುತ್ತಾ, ದಾರಿ ತೋರುವ ಗುರುವಾಗಿಬಿಡುತ್ತದೆ.

ಸ್ಮಾರ್ಟ್‌ಫೋನ್ ಅಥವಾ ಅದೇ ರೀತಿ ಕಾಣಿಸಬಲ್ಲ ಜಿಪಿಎಸ್ ನ್ಯಾವಿಗೇಶನ್ ಸಾಧನವನ್ನು ಒಳಗೊಂಡಿರುವ ಸುಲಭವಾದ ಮಾರ್ಗದರ್ಶಕ ತಂತ್ರಜ್ಞಾನವನ್ನು ಈಗೀಗ ಬಹುತೇಕ ಎಲ್ಲ ಕಾರುಗಳ ಡ್ಯಾಶ್‌ಬೋರ್ಡುಗಳಲ್ಲಿಯೂ ನೀವು ನೋಡಿರಬಹುದು.

Google Maps useageಒಂದು ಪ್ರದೇಶದ ನಕ್ಷೆಯ ಮೂಲಕ ನಮಗೆ ದಾರಿ ತೋರಿಸಲು ಸಾಕಷ್ಟು ಆ್ಯಪ್‌ಗಳಿವೆ. ಇಂಥವನ್ನು ನಗರ ಪ್ರದೇಶದಲ್ಲಿರುವ ಕೆಲವರು ಬಳಸಿ ನೋಡಿದ್ದಾರೆ, ಹೆಚ್ಚಿನವರು ಇದು ಬಳಕೆಗೆ ಕಷ್ಟ ಎಂದುಕೊಂಡು ಸುಮ್ಮನಿರುತ್ತಾರೆ. ಗ್ರಾಮೀಣ ಭಾಗದವರಲ್ಲೂ ಕೆಲವರು ಮಾತ್ರವೇ ಇದನ್ನು ಬಳಸಿ ನೋಡಿದ್ದಾರೆ. ಉಪಯುಕ್ತವಾಗಿರುವ ಇದರ ಬಳಕೆ ಕಷ್ಟ ಎಂಬ ಆತಂಕವೇ ಇದಕ್ಕೆ ಕಾರಣ ಎಂಬುದು ಹಲವರನ್ನು ಮಾತನಾಡಿಸಿದಾಗ ನನಗೆ ತಿಳಿದುಬಂದ ವಿಚಾರ. ದಾರಿ ತಪ್ಪಿದಾಗ ಇದು ತುಂಬಾ ಪ್ರಯೋಜನಕಾರಿ ಹಾಗೂ ಬಳಕೆಗೆ ತೀರಾ ಸುಲಭ ಎಂದು ತಿಳಿಸಿಕೊಡುವುದು ಈ ಲೇಖನದ ಉದ್ದೇಶ. ಈ ತಂತ್ರಜ್ಞಆನವು ಮೊಬೈಲ್ ಸ್ಕ್ರೀನ್‌ನಲ್ಲಿ ನಾವು ಹೋಗಬೇಕಾದಲ್ಲಿಗೆ ನಕ್ಷೆಯ ಮೂಲಕ ದಾರಿ ತೋರಿಸುತ್ತದೆಯಲ್ಲದೆ, ಧ್ವನಿಯ ಮೂಲಕವೂ ಮುಂದೆ ಯಾವ ಕಡೆ ತಿರುಗಬೇಕೆಂಬುದನ್ನು ಹೇಳುತ್ತದೆ ಎಂದಾಗ ಕೆಲವರು ಅಚ್ಚರಿಪಟ್ಟಿದ್ದನ್ನು ನೋಡಿದ್ದೇನೆ. ಈ ಕುರಿತ ಮಾಹಿತಿಯು ಎಲ್ಲರಿಗೂ ತಲುಪಿಲ್ಲ ಎಂಬ ಕಾರಣಕ್ಕೆ ಈ ಬಾರಿ ಇದರ ಪರಿಚಯ.

ನ್ಯಾವಿಗೇಶನ್ ಆ್ಯಪ್‌ಗಳು ಸಾಕಷ್ಟಿವೆ. ಹೆಚ್ಚಾಗಿ ಆಂಡ್ರಾಯ್ಡ್ ಸ್ಮಾರ್ಟ್‌ಫೋನ್‌ಗಳಲ್ಲಿ Google Maps ಎಂಬ ಆ್ಯಪ್ ಇರುತ್ತದೆ. ಇದಲ್ಲದೆ, ನೀವು ಮೊಬೈಲ್‌ನಲ್ಲೇ ಗೂಗಲ್ ಪ್ಲೇ ಸ್ಟೋರ್‌ಗೆ ಹೋಗಿ, Maps ಅಂತ ಸರ್ಚ್ ಮಾಡಿದರೆ, ವೈವಿಧ್ಯಮಯ ಆ್ಯಪ್‌ಗಳು ಕಾಣಿಸುತ್ತವೆ. ಅದರಲ್ಲಿ ಉಚಿತವಾಗಿರುವ Sygic, HERE WeGo ಎಂಬವನ್ನು ನಾನೂ ಬಳಸಿ ನೋಡಿದ್ದೇನೆ. ಆಂಡ್ರಾಯ್ಡ್ ಅಲ್ಲದೆ, ಆ್ಯಪಲ್ ಫೋನ್‌ಗಳಿಗೂ ಇವು ಲಭ್ಯ.

ಇದು ಹೇಗೆ?: ಹೆಚ್ಚು ಜನಪ್ರಿಯವಾಗಿರುವ ಗೂಗಲ್ ಮ್ಯಾಪ್ಸ್ ತೆರೆಯಿರಿ. ಇತ್ತೀಚೆಗೆ ಗೂಗಲ್ ಮ್ಯಾಪ್ ಸಾಕಷ್ಟು ಸುಧಾರಣೆ ಕಂಡಿದ್ದು, ಪರಿಷ್ಕೃತ ಆವೃತ್ತಿಯಲ್ಲಿ ಗೆಟ್ ಡೈರೆಕ್ಷನ್ಸ್ ಎಂಬ ಶೀರ್ಷಿಕೆಯಡಿ ನಾಲ್ಕು ಬಟನ್‌ಗಳು ಕಾಣಿಸುತ್ತವೆ. ಡ್ರೈವ್, ಮೆಟ್ರೋ/ಬಸ್, ವಾಕ್, ಕ್ಯಾಬ್ ಎಂಬ ನಾಲ್ಕು ಆಯ್ಕೆಗಳಿವೆ. ‘ಡ್ರೈವ್’ ಮೇಲೆ ಬೆರಳೊತ್ತಿದ ತಕ್ಷಣ ಮೊದಲ ಬಾಕ್ಸ್‌ನಲ್ಲಿ ನೀವು ಈಗ ಇರುವ ಸ್ಥಳ (ಯುವರ್ ಲೊಕೇಶನ್) ಅಂತ ಇರುತ್ತದೆ. ಅದರ ಕೆಳಗಿನ ಬಾಕ್ಸ್‌ನಲ್ಲಿ ‘Choose Destination’ ಅಂತ ಬರೆದಿರುವಲ್ಲಿ ಸ್ಪರ್ಶಿಸಿ, ನೀವು ಹೋಗಬೇಕಾದ ಸ್ಥಳವನ್ನು ನಿಧಾನವಾಗಿ ಟೈಪ್ ಮಾಡುತ್ತಾ ಹೋಗಿ. ಅಥವಾ ಬಾಕ್ಸ್‌ನ ಬಲತುದಿಯಲ್ಲಿರುವ ಮೈಕ್‌ನಂತೆ ಕಾಣಿಸುವ ಐಕಾನ್ ಒತ್ತಿ, ಬಾಯಲ್ಲಿ ಸ್ಥಳದ ಹೆಸರು ಹೇಳಿದರೂ ಸಾಕು. ಗೂಗಲ್ ಗುರುತಿಸುತ್ತದೆ ಮತ್ತು ಸಂಬಂಧಿಸಿದ ಸ್ಥಳದ ಪಟ್ಟಿಯನ್ನು ವಿಳಾಸ ಸಹಿತ ನಿಮ್ಮ ಮುಂದಿಡುತ್ತದೆ. ಬೇಕಾದುದನ್ನು ಆಯ್ಕೆ ಮಾಡಿಕೊಳ್ಳಿ. ನೀವು ಎಲ್ಲಿದ್ದೀರಿ ಎಂಬುದನ್ನು ಗೂಗಲ್ ಮೊದಲೇ ಗ್ಲೋಬಲ್ ಪೊಸಿಷನಿಂಗ್ ಸಿಸ್ಟಂ (ಜಿಪಿಎಸ್) ಎಂಬ ಉಪಗ್ರಹ ನೆರವಿನ ವ್ಯವಸ್ಥೆಯ ಮೂಲಕ ಗುರುತಿಸಿಟ್ಟುಕೊಂಡಿರುತ್ತದೆ. ಗಮ್ಯಸ್ಥಳದ ಹೆಸರನ್ನು ನಿಧಾನವಾಗಿ ಒತ್ತುತ್ತಿರುವಾಗ, ಡ್ರಾಪ್‌ಡೌನ್ ವಿಂಡೋದಲ್ಲಿ ಹಲವಾರು ಸಲಹೆಗಳು ಗೋಚರಿಸುತ್ತವೆ. ನಿಮಗೆ ಬೇಕಾದ ಸ್ಥಳದ ಹೆಸರಿನ ಮೇಲೆ ಒತ್ತಬಹುದು ಅಥವಾ ನೀವೇ ಪೂರ್ತಿಯಾಗಿ ಟೈಪ್ ಮಾಡಿ, ಕೀಬೋರ್ಡ್‌ನಲ್ಲಿ ಎಂಟರ್ ಬಟನ್ ಒತ್ತಬಹುದು.

ಆಗ ನಕ್ಷೆಯಲ್ಲಿ ದಪ್ಪ ನೀಲಿ ಗೆರೆ ಕಾಣಿಸುತ್ತದೆ. ಅದು ನೀವು ಕ್ರಮಿಸಬೇಕಾಗಿರುವ ಮಾರ್ಗ. ಕೆಳ ಭಾಗದಲ್ಲಿ, ‘ರೂಟ್ ಇನ್ಫೋ’ ಎಂಬುದನ್ನು ತಟ್ಟಿ ನೋಡಿದರೆ, ಮುಂದೆ ಹೇಗೆ ಹೋಗುವುದು, ಎಲ್ಲಿ ತಿರುಗಬೇಕು, ಯಾವ ಊರಿಗೆ (ಸ್ಥಳಕ್ಕೆ) ಎಷ್ಟು ದೂರ ಇದೆ, ಗಮ್ಯ ಸ್ಥಳಕ್ಕೆ ಎಷ್ಟು ಹೊತ್ತಿಗೆ ತಲುಪಬಹುದು ಅಂತೆಲ್ಲ ಮಾಹಿತಿಯ ಪಟ್ಟಿಯೇ ಕಾಣಿಸುತ್ತದೆ. ಬೇಕಿದ್ದರೆ ನೋಡಿಕೊಳ್ಳಿ. ಇಲ್ಲವೆಂದಾದರೆ, ‘ಸ್ಟಾರ್ಟ್’ ಬಟನ್ ಒತ್ತಿಬಿಡಿ. ಸ್ಕ್ರೀನ್ ಮೇಲೆ ಡೈರೆಕ್ಷನ್ ಕಾಣಿಸುತ್ತದೆ. ಸೈಕಲ್, ಬೈಕ್ ಅಥವಾ ಕಾರಲ್ಲಿ ಹೋಗುತ್ತಿದ್ದರೆ, ಕಿವಿಗೆ ಇಯರ್‌ಫೋನ್ ಅಳವಡಿಸಿಕೊಳ್ಳುವುದು ಒಳಿತು. ಯಾಕೆಂದರೆ, ಧ್ವನಿ ಆಧಾರಿತ ಮಾರ್ಗದರ್ಶನ ಇರುವುದರಿಂದ, ಕೇಳುವುದು ಸುಲಭವಾಗುತ್ತದೆ. ನೂರು ಮೀಟರ್ ಬಳಿಕ ಬಲಕ್ಕೆ ತಿರುಗಿ, 1.8 ಕಿ.ಮೀ. ನಂತರ ಎಡಕ್ಕೆ ತಿರುಗಿ ಅಂತೆಲ್ಲ ಹೇಳುತ್ತಾ ಹೋಗುತ್ತದೆ ಹಾಗೂ ತಿರುಗಬೇಕಾದಲ್ಲಿಯೂ ಅದು ಮತ್ತೊಮ್ಮೆ ನೆನಪಿಸುತ್ತದೆ. ದೂರದೂರಿಗೆ ಹೋಗುವಾಗ ದಾರಿಯ ಮಧ್ಯೆ ಪಕ್ಕದೂರಿಗೆ ಹೋಗಿ ಬರಬೇಕಿದ್ದರೆ, ಅದನ್ನೂ ಸೇರಿಸಲು ಅವಕಾಶವಿದೆ. ಮ್ಯಾಪ್ ಬಳಸಲು ಪ್ರಯತ್ನಿಸಿ ನೋಡಿದಾಗ ನಿಮಗೂ ಇವೆಲ್ಲ ಸುಲಭ ಎಂಬುದು ಅನುಭವಕ್ಕೆ ಬರುತ್ತದೆ.

ಈ ಹಂತದಲ್ಲಿ ಕೂಡ ಸ್ಕ್ರೀನ್ ಮೇಲೆ ಡ್ರೈವಿಂಗ್, ಬಸ್ ರೂಟ್, ಕಾಲ್ನಡಿಗೆಯ ರೂಟ್ ಹೊಂದಿಸುವ ಬಟನ್‌ಗಳು ಕಾಣಿಸುತ್ತವೆ. ಸಮೀಪದ ಸ್ಥಳಗಳಿಗೆ ಕಾಲ್ನಡಿಗೆಯ ಪಥದಲ್ಲಿ ಸಾಗಿದರೆ ಎಷ್ಟು ಸಮಯ, ವಾಹನದಲ್ಲಿ ಸಾಗಿದರೆ ಎಷ್ಟು ಸಮಯ ಅಂತೆಲ್ಲ ಲೆಕ್ಕಾಚಾರವೂ ಕಾಣಿಸುತ್ತದೆ. ಜತೆಗೆ, ಓಲಾ, ಉಬರ್ ಮುಂತಾದವುಗಳ ಮೂಲಕ ಮ್ಯಾಪ್ ಮೂಲಕವೇ ಟ್ಯಾಕ್ಸಿ ಬುಕ್ ಮಾಡುವ ಆಯ್ಕೆಯೂ ಇದೆ.

ನಗರ ಪ್ರದೇಶದಲ್ಲಾದರೆ, ಟ್ರಾಫಿಕ್ ಹೇಗಿದೆ, ಹತ್ತಿರದ ಅಥವಾ ಟ್ರಾಫಿಕ್ ಸಮಸ್ಯೆ ಹೆಚ್ಚಿಲ್ಲದ ಪರ್ಯಾಯ ಮಾರ್ಗವೇನು ಎಂಬುದನ್ನೂ, ದೂರ ಹೋಗುವುದಿದ್ದರೆ ಟೋಲ್ ಇಲ್ಲದ ರಸ್ತೆಯನ್ನು ಆಯ್ಕೆ ಮಾಡಿಕೊಳ್ಳುವುದಕ್ಕೂ ಇದೇ ಮ್ಯಾಪ್ (ರೂಟ್ ಇನ್ಫೋ ಮೂಲಕ) ಅನುವು ಮಾಡಿಕೊಡುತ್ತದೆ.

ಗಮನಿಸಬೇಕಾದ ಅಂಶವೆಂದರೆ, ನಗರ ಪ್ರದೇಶದಲ್ಲಾದರೆ ಇಂಟರ್ನೆಟ್ ಸಂಪರ್ಕವಿದ್ದಾಗ ಉಪಗ್ರಹದ ಸಿಗ್ನಲ್ ಮೂಲಕ ಸ್ಥಳದ ಗುರುತಿಸುವಿಕೆ ನಿಖರವಾಗಿರುತ್ತದೆ. ಗ್ರಾಮೀಣ ಪ್ರದೇಶದಲ್ಲಿ, ಕಾಡು ಪ್ರದೇಶದಲ್ಲಿ ಉಪಗ್ರಹದ ಸಿಗ್ನಲ್ ಸ್ವೀಕಾರಕ್ಕೆ ಅಡ್ಡಿಯಾದಲ್ಲಿ ಕೊಂಚ ತೊಡಕಾಗಬಹುದು. ಆದರೂ ದುರ್ಗಮ ಪ್ರದೇಶದಲ್ಲಿ ದಾರಿ ತಪ್ಪಿ, ಯಾವ ಕಡೆ ಹೋಗಬೇಕೆಂಬುದು ತಿಳಿಯದೇ ಇದ್ದರೆ ಗೂಗಲ್ ಮ್ಯಾಪ್ಸ್ ಟ್ರೈ ಮಾಡಿ ನೋಡಲಡ್ಡಿಯಿಲ್ಲ.

ಜತೆಗೆ, ಇಂಟರ್ನೆಟ್ ಆನ್ ಇರುವಾಗ ನೀವಿರುವ ಪ್ರದೇಶದ ಅಥವಾ ದೂರ ಪ್ರಯಾಣದ ಹಾದಿಯ ಆಫ್‌ಲೈನ್ ನಕ್ಷೆಯನ್ನು ಡೌನ್‌ಲೋಡ್ ಮಾಡಿಟ್ಟುಕೊಳ್ಳಬಹುದು. ನಂತರ ನ್ಯಾವಿಗೇಶನ್ ಸಂದರ್ಭದಲ್ಲಿ ಇಂಟರ್ನೆಟ್ ಸಂಪರ್ಕ/ನೆಟ್‌ವರ್ಕ್ ಇಲ್ಲದಿದ್ದರೂ ಗೂಗಲ್ ಮ್ಯಾಪ್ ಬಳಸಬಹುದಾಗಿರುತ್ತದೆ. ನಗರದಲ್ಲಿ ಸುತ್ತಾಡುವಾಗ ಇಂಟರ್ನೆಟ್ ಆನ್ ಇದ್ದರೆ, ನೈಜ ಸಮಯದ ಟ್ರಾಫಿಕ್ ಮಾಹಿತಿ ನಮ್ಮ ಮ್ಯಾಪ್‌ನಲ್ಲಿ ಅಪ್‌ಡೇಟ್ ಆಗಿರುತ್ತದೆ.

ಮಾಹಿತಿ@ತಂತ್ರಜ್ಞಾನ: ಅವಿನಾಶ್ ಬಿ. ವಿಜಯ ಕರ್ನಾಟಕ ಅಂಕಣ, 4 ಸೆಪ್ಟೆಂಬರ್ 2017

Advertisements

ನೀವೇನಂತೀರಾ?

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s